Пілігрымка у Мінск: духоўнае і культурнае побач PDF Печать E-mail
11.07.2015 19:52

Фотарэпартаж

8 ліпеня адбылося незабыўнае падарожжа ў Мінск. Першапачаткова Лучайская парафія атрымала запрашэнне ад свайго добрага сябра, шматразовага ўдзельніка лучайскіх фэстаў, акардэаніста-віртуоза Дзмітрыя Корсака, наведаць канцэрт-прэзентацыю яго творчасці.

26 

 

Вядома, што лучайскі пробашч вельмі ахвочы да розных вандровак, таму ўзнікла цікавая ідэя спалучыць наведванне канцэрта з пілігрымкай па мінскіх святынях. Да ўдзелу былі запрошаныя і шаркаўчане. Яны вельмі актыўна адгукаюцца на падобныя прапановы. Тым больш, што некаторыя старонкі з гісторыі гэтых святыняў пераплецены з гісторыяй Шаркаўшчыны і яе ўраджэнцамі.


Шчасліваму падарожжу спрыяла, здаецца, усе! З малітвай, з песнямі даехалі пілігрымы на камфартабельным аўтобусе да Мінску. Там ўжо чакаў на іх прафесійны гід Валянціна Кароткіна. Надвор'е ў гэты дзень выдалася вельмі лагодным, адсутнічала тая страшная спёка, якая звычайна бывае ў ліпені.

Праз увесь дзень пілігрымы ў суправаджэнні гіда наведалі гістарычны цэнтр горада і пазнаёміліся з яго забыткамі. Асноўным пунктам было наведванне святыняў.

Архікатэдральны касцёл Імя Найсвяцейшай Панны Марыі: у гэтым велічным храме, які пабудаваны ў стылі віленскага барока, насценныя роспісы выкананыя ўраджэнцам Шаркаўшчыны, мастаком Казімірам Анташэўскім. Доўгі час пробашчам тут з'яўляецца ксёндз Антон Клімантовіч, які паходзіць з вёскі Лабуці Шаркаўшчынскага раёна.

 

Сваёй легендарнай гісторыяй і прыгажосцю ўразіў Чырвоны касцёл. Аказваецца і тут пакінуў след наш зямляк: ксендз біскуп Вінцэнт Ключыньскі, які нарадзіўся напрыканцы ХІХ стагоддзя ў Шаркаўшчыне, асвяціў гэты храм у 1910 годзе. А пробашч касцёла святых Сымона і Алены ксёндз прэлат Уладзіслаў Завальнюк стаяў ля вытокаў адраджэння парафіі ў Шаркаўшчыне ў канцы 80-х гадоў мінулага стагоддзя.

 

Касцёл Узвышэння Святога Крыжа схаваны ад людзкога вока ў цішы Кальварыйскіх могілак, таксама пакінуў незабыўны след у сэрцах вернікаў. Тут адбылася самая галоўная падзея пілігрымкі – святая Імша. Нажаль, пробашч гэтай святыні ксёндз Андрэй Сіповіч, будучы на сімпозіуме, адсутнічаў у гэты дзень і пілігрымам не ўдалося прывітацца з сынам шаркаўшчынскай зямлі.

 

Крыху стомленныя вандроўнікі атрымалі цудоўную магчымасць адпачыць увечары на яскравым, фантастычным канцэрце-прэзентацыі Дзмітрыя Корсака. Для маладога музыканта ў гэты дзень адбылася гістарычная падзея – першы яго творчы вечар, на які сабраў поўную тысячную канцэртную залу.

45

 

Павіншаваць акардэаніста-віртуоза прыйшлі многія аматары добрай музыкі і таксама беларускія эстрадныя выканаўцы: Іван Буслай, Аляксей Хлястоў, Георгій Калдун, Аляксандр Гелах і іншыя. Прысутнічалі ў зале і самыя блізкія музыканту людзі – яго бацькі, а таксама шматлікія сябры і прыхільнікі яго творчасці. Асобнае месца сярод блізкіх сяброў належыць ксяндзу Мікалаю Ліпскаму. Святар мае выключную здольнасць заўважаць таленты і магчымасці іншых. Менавіта лучайскаму пробашчу выказаў удзячнасць Дзмітрый Корсак на вокладцы свайго першага альбома "Эй, соколы!" – за падтрымку ў ажыццяўленні сваёй мары. Вельмі прыемным сюрпрызам стаў верш, напісаны шаркаўшчынскай паэткай Кацярынай Соснай. Аўтарка прысвяціла свой твор музыканту і прачытала яго са сцэны. А якім жа чуллівым момантам стала ўручэнне кветак акардэаністу-віртуозу ад самай маленькай удзельніцы пілігрымкі, якой толькі чатыры годзікі! І вось так пад аккорды музыканта і добры настрой адышоў у гісторыю чарговы прыгожы дзень.

 

Пілігрымка, якая была насычана прыемнымі ўражаннямі скончылася, але вандроўнікі не хочуць спыняцца. Яны з вялікім задавальненнем адгукнуліся на запрашэнне да ўдзелу ў чарговых святах, якія будуць ладзіцца ў Лучаі 25 ліпеня, а таксама з нецярпенням будуць чакаць новых пілігрымак, якія могуць ўзнікнуць у бліжэйшы час.

 

Тэкст: Алена Клімза-Колтан.
Фота: кс. Мікалай Ліпскі, relax.by

 

Галоўная   Фотагалерэя   Гiсторыя   Кантакты   Мапа сайта 

Рыма-каталіцкая парафія Св.Тадэвуша Апостала ў в.Лучай Пастаўскага раёна

211852 в.Лучай, вул.Cадовая 10/1, Пастаўскі раён, Віцебская вобласць, Рэспубліка Беларусь

Тэл./факс: +375-29-803-78-44; e-mail: luchaitadeusz@gmail.com

Выкарыстанне матэрыялаў дазваляецца пры ўмове спасылкі на luchai.by

 

© 2012-2017 Парафія св. Юды Тадэвуша ў в. Лучай